Articles

ਉੱਚੀ ਸੋਚ ਰੱਖਕੇ ਬਣੋ ਜਿੰਦਗੀ ਵਿੱਚ ਕਾਮਯਾਬ

  • Punjabi Bulletin
  • Sep 20, 2023
ਉੱਚੀ ਸੋਚ ਰੱਖਕੇ ਬਣੋ ਜਿੰਦਗੀ ਵਿੱਚ ਕਾਮਯਾਬ
  • 160 views

ਜ਼ਿੰਦਗੀ ਇੱਕ ਅਨਮੋਲ ਖਜ਼ਾਨਾ ਹੈ। ਹਰ ਇਨਸਾਨ ਦੀ ਜਿੰਦਗੀ ਵਿੱਚ ਉਤਾਰ- ਚੜ੍ਹਾਅ ਆਉਂਦੇ ਹੀ ਰਹਿੰਦੇ ਹਨ। ਕਈ ਇਨਸਾਨ ਲਗਾਤਾਰ ਆ ਰਹੇ ਉਤਾਰ-ਚੜਾਅ  ਕਾਰਨ ਡਾਵਾਂਡੋਲ ਹੋ ਜਾਂਦੇ ਹਨ। ਉਨ੍ਹਾਂ ਨੂੰ ਜ਼ਿੰਦਗੀ ਬੋਝ ਜਿਹੀ ਲੱਗਣ ਲੱਗ ਜਾਂਦੀ ਹੈ। ਅਜਿਹੇ ਇਨਸਾਨ ਜਿੰਦਗੀ ਨੂੰ ਹੱਸ ਖੇਡ ਕੇ ਨਹੀਂ ਗੁਜ਼ਾਰਦੇ ,ਸਗੋਂ ਕੱਟਦੇ ਹਨ। ਨਕਰਾਤਮਕ ਵਿਚਾਰ ਉਹਨਾਂ ਦੇ ਅੰਦਰ ਘਰ ਕਰ ਜਾਂਦੇ ਹਨ।ਉਹ ਆਪਣੇ ਆਪ ਨੂੰ ਹਾਰਿਆ ਹੋਇਆ ਮਹਿਸੂਸ ਕਰਨ ਲੱਗ ਜਾਂਦੇ ਹਨ। ਜਿਸ ਕਾਰਨ ਉਨ੍ਹਾਂ ਦੀ ਸੋਚ ਨਕਰਾਤਮਕ ਬਣ ਜਾਂਦੀ ਹੈ। ਉਹ ਆਪਣੇ ਮਨ ਚਾਹੇ ਟੀਚੇ ਤੇ ਨਹੀਂ ਪੁੱਜ ਸਕਦੇ। ਕੁਦਰਤ ਨੇ ਸੋਹਣੀ ਜ਼ਿੰਦਗੀ ਬਖ਼ਸ਼ੀ ਹੈ । ਅੱਜਕਲ੍ਹ ਦੀ ਜ਼ਿੰਦਗੀ ਤਾਂ ਵੈਸੇ ਹੀ ਬਹੁਤ ਛੋਟੀ ਹੈ। ਪਤਾ ਹੀ ਨਹੀਂ ਲੱਗਦਾ ਕੌਣ ਕਦੋਂ  ਇਸ ਸੰਸਾਰ 'ਚੋਂ  ਰੁਖ਼ਸਤ ਕਰ ਜਾਂਦਾ ਹੈ।ਇਸ ਨੂੰ ਚੰਗੇ ਕੰਮਾਂ ਵਿੱਚ ਲਗਾਓ। ਮਿਹਨਤ ਕਰਦੇ ਰਹੋ ।ਚੰਗੇ ਕਰਮ ਕਰੋ। ਕਿਸੇ ਦਾ ਵੀ ਮਾੜਾ ਨਾ ਸੋਚੋ। ਜੇ ਤੁਸੀਂ ਮੰਜ਼ਿਲ ਤੱਕ ਨਹੀਂ ਪੁੱਜ ਸਕੇ ਤਾਂ ਆਪਣੀ ਗਲਤੀਆਂ ਨੂੰ ਦੇਖੋ। ਜੋ ਬੰਦੇ ਮੰਜ਼ਿਲ ਨੂੰ ਸਰ ਕਰ ਚੁੱਕੇ ਹਨ, ਉਨ੍ਹਾਂ ਦੇ ਤਜਰਬੇ ਨੂੰ ਦੇਖੋ। ਇਹ ਨਾ ਸੋਚੋ ਕਿ ਉਹ ਬੰਦਾ ਮੇਰੇ ਤੋਂ ਅੱਗੇ ਕਿਵੇਂ ਨਿਕਲ ਗਿਆ, ਉਸ ਬਾਰੇ ਨਕਰਾਤਮਕ ਸੋਚ ਨਾ ਰੱਖੋ। ਮਿਹਨਤ ਕਰਦੇ ਚਲੋ, ਕਿਹਾ ਵੀ ਜਾਂਦਾ ਹੈ ਮਿਹਨਤ ਸਫ਼ਲਤਾ ਦੀ ਕੁੰਜੀ ਹੈ। ਚਲਦੇ ਰਹਿਣਾ ਹੀ ਜ਼ਿੰਦਗੀ ਹੈ ।ਲਗਾਤਾਰ ਮਿਹਨਤ ਕਰਕੇ ਅਸਫ਼ਲਤਾ ਤੋਂ ਬਾਅਦ ਸਫ਼ਲਤਾ ਜ਼ਰੂਰ ਮਿਲਦੀ ਹੈ।ਅੱਜ ਦੇ ਜ਼ਮਾਨੇ ਵਿੱਚ  ਸਭ ਕੁੱਝ ਸੰਭਵ ਹੈ।ਮਿਹਨਤ ਕਰਕੇ ਤੁਸੀਂ ਵੀ ਮੰਜ਼ਿਲ ਨੂੰ ਸਰ ਕਰ ਸਕਦੇ ਹੋ। ਫਜ਼ੂਲ ਦੀਆਂ ਗੱਲਾਂ ਵਿੱਚ ਆਪਣਾ ਸਮਾਂ ਨਾ ਗੁਆਓ ।ਇਹ ਸਮਾਂ ਬਹੁਤ ਕੀਮਤੀ ਹੁੰਦਾ ਹੈ।

    ਅਕਸਰ ਕਹਿੰਦੇ ਵੀ ਹਨ ਕਿ ਜੇ ਸਮਾਂ ਨਿਕਲ ਗਿਆ, ਤਾਂ ਉਹ ਮੁੜ ਹੱਥ ਨਹੀਂ ਆਉਂਦਾ।ਸਿਆਣੇ ਅਕਸਰ ਕਹਿੰਦੇ ਵੀ ਹਨ ਕਿ ਪੁੱਲਾਂ  ਹੇਠੋਂ ਨਿਕਲਿਆ ਹੋਇਆ ਪਾਣੀ ਵਾਪਿਸ ਨਹੀਂ ਆਉਂਦਾ। ਜੋ ਸਮਾਂ ਬੀਤ ਗਿਆ ਉਹ ਵਾਪਸ ਨਹੀਂ ਆਉਂਦਾ। ਬੀਤੇ ਸਮੇਂ ਦੀਆਂ ਗ਼ਲਤੀਆਂ ਨਾਲ ਆਪਣੇ ਆਪ ਨੂੰ ਨਕਰਾਤਮਕ ਨਾ ਬਣਾਓ। ਗ਼ਲਤੀਆਂ ਤੋਂ ਸਿੱਖੋ। ਹਮੇਸ਼ਾ ਵਰਤਮਾਨ ਵਿੱਚ ਚੱਲਦੇ ਰਹੋ। ਵਰਤਮਾਨ ਵਿੱਚ ਵਧੀਆ ਕੰਮ ਕਰਕੇ ਅਸੀਂ ਭਵਿੱਖ ਨੂੰ ਵਧੀਆ ਬਣਾ ਸਕਦੇ ਹਾਂ। ਹਮੇਸ਼ਾ ਚੰਗੇ ਕਰਮ ਕਰੋ। ਵਧੀਆ ਜਿੰਦਗੀ ਜਿਉਂਣ ਲਈ ਪਰਿਵਾਰ ਵਿੱਚ ਰਹਿੰਦੀਆਂ ਕੁੱਝ ਗੱਲਾਂ ਨੂੰ ਨਜ਼ਰਅੰਦਾਜ਼ ਕਰੋ। ਪਰਿਵਾਰਾਂ ਵਿੱਚ ਰਹਿੰਦਿਆਂ ਕਈ ਵਾਰ ਮਨ ਮੁਟਾਵ ਆਪਸ ਵਿੱਚ ਹੋ ਜਾਂਦਾ ਹੈ। ਕੋਈ ਅਜਿਹਾ ਗਲਤ ਕਦਮ ਨਾ ਚੁੱਕੋ ਜਿਸ ਕਾਰਨ ਸਾਰੀ ਉਮਰ ਪਰਿਵਾਰ ਨੂੰ ਪਛਤਾਉਣਾ ਪੈ ਜਾਵੇ।

 ਚੰਗੀ ਕਿਤਾਬਾਂ ਪੜੋ। ਕਿਤਾਬਾਂ ਨਾਲ ਸਾਨੂੰ ਜਿੰਦਗੀ ਜਿਊਣ ਦੀ ਕਲਾ ਆਉਂਦੀ ਹੈ। ਆਪਣੇ ਘਰ ਵਿੱਚ ਇੱਕ ਛੋਟੀ ਜਿਹੀ ਲਾਇਬ੍ਰੇਰੀ ਸਥਾਪਿਤ ਕਰੋ। ਕਿਤਾਬਾਂ ਵਾਲੀ ਦੁਕਾਨ ਤੋਂ ਆਪਣਾ ਮਨ ਚਾਹਿਆ ਰਸਾਲਾ ਜ਼ਰੂਰ ਖਰੀਦੋ। ਉਸਨੂੰ ਜ਼ਰੂਰ ਪੜ੍ਹੋ। ਚੰਗੇ ਦੋਸਤਾਂ ਦਾ ਸੰਗ ਕਰੋ, ਜੋ ਤੁਹਾਨੂੰ ਮੁਸੀਬਤ ਵੇਲੇ ਹੌਂਸਲਾ ਦੇਣ। ਤੁਹਾਡੇ ਹੌਂਸਲੇਂ ਨੂੰ ਢਹਿ ਢੇਰੀ ਨਾ ਹੋਣ ਦੇਣ। ਤੁਹਾਨੂੰ ਹੋਰ ਮਿਹਨਤ ਕਰਨ ਲਈ ਪ੍ਰੇਰਿਤ ਕਰਨ। ਅੱਜ ਕੱਲ੍ਹ ਦੀ ਦੋਸਤੀ ਪੈਸਾ ਦੇਖ ਕੇ ਹੁੰਦੀ ਹੈ ।ਪੈਸੇ ਦੀ ਹੋੜ ਜਿਆਦਾ ਲੱਗੀ ਹੋਈ ਹੈ। ਰਿਸ਼ਤਿਆਂ ਦਾ ਘਾਣ ਹੋ ਚੁੱਕਿਆ ਹੈ ।ਭਰਾ ਭਰਾ ਦੀ ਆਪਸ ਵਿੱਚ ਨਹੀਂ ਬਣਦੀ। ਇੱਕ ਦੂਜੇ ਨੂੰ ਘਰ ਵਿੱਚ ਹੀ ਨੀਵਾਂ ਦਿਖਾਉਣ ਦੀ ਹੋੜ ਲੱਗੀ ਹੁੰਦੀ ਹੈ। ਪਰਿਵਾਰਿਕ ਮੈਂਬਰ ਇਕ ਦੂਜੇ ਦੀ ਇੱਜ਼ਤ ਨਹੀਂ ਕਰਦੇ। ਸਹਿਣਸ਼ੀਲਤਾ ਖਤਮ ਹੋ ਚੁੱਕੀ ਹੈ। ਨਿਮਰਤਾ, ਪਿਆਰ ਤੇ ਸਤਿਕਾਰ ਮਨੁੱਖੀ ਜੀਵਨ ਦੇ ਗਹਿਣੇ ਹਨ। ਜੇ ਪ੍ਰਮਾਤਮਾ ਨੇ ਤੁਹਾਨੂੰ ਬਹੁਤ ਦਿੱਤਾ ਹੋਇਆ ਹੈ ਤਾਂ ਲੋੜਵੰਦਾਂ ਦੀ ਮਦਦ ਕਰੋ। ਲੋੜਵੰਦ ਇਨਸਾਨ ਤੁਹਾਨੂੰ ਅਸੀਸ ਦੇਵੇਗਾ। ਦੂਜਿਆਂ ਵਿੱਚ ਕਮੀਆਂ ਨਾ ਕੱਢੋ। ਚੁਗਲੀ ਤੋਂ ਪਰਹੇਜ ਕਰੋ। ਦੂਜਿਆਂ ਦੀ ਕਮੀਆਂ ਕੱਢਦੇ ਰਹੋਗੇ ਤਾਂ ਤੁਹਾਡੇ ਵਿੱਚ ਵੀ ਉਸ ਇਨਸਾਨ ਦੀਆਂ ਕਮੀਆਂ  ਆ ਜਾਣਗੀਆਂ। ਹਮੇਸ਼ਾ ਆਪਣੇ ਲਈ ਸਮਾਂ ਕੱਢੋ। ਅੱਜ ਦੀ ਦੌੜ ਭੱਜ ਜ਼ਿੰਦਗੀ ਵਿੱਚ ਇਨਸਾਨ ਆਪਣੇ ਲਈ ਸਮਾਂ ਨਹੀਂ ਕੱਢਦਾ ਹੈ। ਵਧੀਆ ਸੋਚ, ਸਕਰਾਤਮਕ ਵਿਚਾਰ ਰੱਖ ਕੇ ਅਸੀਂ ਮੰਜ਼ਿਲ ਨੂੰ ਸਰ ਕਰ ਸਕਦੇ ਹਾਂ।

ਸੰਜੀਵ ਸਿੰਘ ਸੈਣੀ, ਮੋਹਾਲੀ 7888966168
Additional links

Calgary
contact@punjabilinkradio.com

Flag Counter
Punjabi Link & Punjabi Bulletin

© 2016-2024