ਕੈਨੇਡਾ ਵਿਚ ਕਾਰਬਨ ਦੀ ਕੀਮਤ 65 ਡਾਲਰ ਟਨ ਤੱਕ ਪਹੁੰਚੀ

ਕੈਨੇਡਾ-ਕੈਨੇਡਾ ਵਿਚ ਰਾਸ਼ਟਰੀ ਕਾਰਬਨ ਦੀ ਕੀਮਤ ਵਿੱਚ ਅੱਜ ਤੱਕ ਦਾ ਸਭ ਤੋਂ ਵੱਡਾ ਵਾਧਾ ਹੋਇਆ। ਇਹ ਵਾਧਾ 50 ਡਾਲਰ ਪ੍ਰਤੀ ਟਨ ਨਿਕਾਸੀ ਤੋਂ ਵੱਧ ਕੇ 65 ਡਾਲਰ ਹੋ ਗਿਆ। ਜਾਣਕਾਰੀ ਮੁਤਾਬਕ ਇਸ ਵਾਧੇ ਨਾਲ ਲੱਖਾਂ ਪਰਿਵਾਰਾਂ ਨੂੰ ਸਰਚਾਰਜ ਲਈ ਮੁਆਵਜ਼ਾ ਦੇਣ ਲਈ ਮਿਲਣ ਵਾਲੀਆਂ ਛੋਟਾਂ ਵੀ ਵਧਣੀਆਂ ਤੈਅ ਹਨ। ਆਮ ਤੌਰ ’ਤੇ, ਰਾਸ਼ਟਰੀ ਕੀਮਤ ਸਲਾਨਾ 10 ਡਾਲਰ ਵਧਦੀ ਹੈ ਪਰ ਇਸ ਸਾਲ ਫੈਡਰਲ ਸਰਕਾਰ ਦੀ ਮਜ਼ਬੂਤ ਜਲਵਾਯੂ ਯੋਜਨਾ ਦੇ ਤਹਿਤ ਇਹ 15 ਡਾਲਰ ਵਧ ਰਿਹਾ ਹੈ। ਇਸ ਸਬੰਧੀ ਕੈਨੇਡੀਅਨ ਟੈਕਸਪੇਅਰਜ਼ ਫੈਡਰੇਸ਼ਨ ਦਾ ਕਹਿਣਾ ਹੈ ਕਿ ਇਸ ਮਹੀਨੇ ਦੇ ਵਾਧੇ ਨਾਲ ਓਨਟਾਰੀਓ ਅਤੇ ਸਾਰੇ ਪ੍ਰੇਰੀ ਪ੍ਰਾਂਤਾਂ ਵਿੱਚ ਰਹਿੰਦੇ ਕੈਨੇਡੀਅਨਾਂ ਲਈ ਪੰਪ ’ਤੇ ਪ੍ਰਤੀ ਲੀਟਰ ਵਾਧੂ ਤਿੰਨ ਸੈਂਟ ਸ਼ਾਮਲ ਹੋਣਗੇ। ਫੈਡਰੇਸ਼ਨ ਦਾ ਅੰਦਾਜ਼ਾ ਹੈ ਕਿ ਵਾਧੇ ਤੋਂ ਬਾਅਦ, ਕਾਰਬਨ ਕੀਮਤਾਂ ਦਾ ਕੁੱਲ ਪ੍ਰਭਾਵ 14 ਸੈਂਟ ਪ੍ਰਤੀ ਲੀਟਰ ਗੈਸੋਲੀਨ, ਹੋਰ 12 ਸੈਂਟ ਪ੍ਰਤੀ ਕਿਊਬਿਕ ਮੀਟਰ ਕੁਦਰਤੀ ਗੈਸ ਅਤੇ ਹੋਰ 17 ਸੈਂਟ ਪ੍ਰਤੀ ਲੀਟਰ ਡੀਜ਼ਲ ਦੇ ਬਰਾਬਰ ਹੋਵੇਗਾ। ਇਸ ਵਾਧੇ ਬਾਰੇ ਵਾਤਾਵਰਣ ਮੰਤਰੀ ਸਟੀਵਨ ਗਿਲਬੌਲਟ ਨੇ ਕਿਹਾ ਕਿ ਬਹੁਤੇ ਪਰਿਵਾਰ ਜਿਹੜੇ ਪ੍ਰੋਵਿੰਸਾਂ ਵਿੱਚ ਰਹਿੰਦੇ ਹਨ ਜਿੱਥੇ ਫੈਡਰਲ ਫਿਊਲ ਚਾਰਜ ਲਾਗੂ ਹੁੰਦਾ ਹੈ ਉਹਨਾਂ ਨੂੰ ਉਹਨਾਂ ਦੇ ਭੁਗਤਾਨ ਨਾਲੋਂ ਵੱਧ ਪੈਸੇ ਵਾਪਸ ਮਿਲਣਗੇ।